Archivos por etiqueta: educacion

12 ene

El Cantar del Vasu – la llingua asturiana tien futuru

El Cantar del Vasu ye un proyectu didácticu que naz nes escueles y institutos d’Asturies adaptando’l popular Cup Song. El cantar y la coreografía quieren ser un reflexu de la importancia de la tresmisión interxeneracional pa caltener la llingua asturiana.

Esti vidiu ye una compilación d’esti proyectu durante’l cursu escolar 2013-14 y cunta cola collaboración de persones y entidaes ayenes al ámbitu educativu que se sumaron a esta iniciativa col enfotu que que la llingua asturiana tenga un futuru dignu.

05 may

¿Que te paecería presentar la llingua asturiana al mundiu d’esta manera?

Esti sábadu, un grupu de docentes d’asturianu (cola collaboración de la Xunta pola Defensa de la Llingua Asturiana y el SNL de Siero) organizamos un actu en La Pola Siero cola intención de grabar un vidiu.

Igual conoces esti vidiu grabáu polos alumnos y alumnes d’un institutu d’Irlanda nel Día de la Llingua Irlandesa del añu pasáu ¡¡¡lleva casi 6 millones de visualizaciones!!! ¿Qué te paecería presentar la llingua asturiana al mundiu d’esta manera?

Nesti momentu tenemos material grabao nos institutos de Noreña y La Pola Siero, asina como na Escuela de Martimporra (Bimenes), y los alumnos/es d’asturianu lleven practicando dende va selmanes con munches ganes. Sicasí, queremos abrilo, facelo más participativo y interxeneracional, necesitámoste.

Necesitámoste’l sábadu en La Pola, necesitámoste espardiendo la idega, necesitámoste atropando xente.

Cuntamos contigo.

Actualización 08/05/2014: Si quies practicar equí tienes un vidiu fechu polos alumnos y alumnes del I.E.S. de Noreña.

El Cantar del Vasu ye un proyectu de Xuncir.