Proyectu

Con ocasión del Día de les Lletres Asturianes, un grupu de docentes de l’asignatura de llingua asturiana, en collaboración con dellos centros educativos, decidimos poner en marcha un proyectu didácticu qu’animara a fomentar l’usu del nuestru idioma ente la xente más mozo, cola vista puesta na problemática de la tresmisión xeneracional.

Al mesmu tiempu, ún de los proyectos didácticos del área curricular de llingua asturiana consiste en crear ferramientes que valgan pa la promoción d’esta asignatura y dir desaniciando los prexuicios que l’arrodien, poniéndola al serviciu de la cultura asturiana actual como elementu xenerador de riqueza y válidu pa la creación en tolos aspectos de la vida moderna.

N’años anteriores fixéronse esperiencies didáctiques asemeyaes que tuvieron repercusión nos diferentes medios de comunicación (TPA, radio, prensa…) pero esta vez pretendemos dir un pasín más alantre dando un saltu cualitativu con presencia significativa na Rede. Pa ello quiximos implicar a alumnáu de toles etapes educatives y collaborar con persones del mundiu audiovisual, la música y la creación cultural o simplemente con repercusión dientro de la sociedá asturiana.

Preocupaos pola situación de la llingua asturiana, empobinada a la desapaición y confinada a ámbitos mui rellacionaos colo tradicional, queremos sacala d’esi furacu y da-y aire pa que respire. Queremos abrir les ventanes del mundu a la nuestra llingua y demostrar que la tresmisión xeneracional ye la clave.

Pa ello escoyimos sumanos a una corriente que s’espardió apocayá nes redes sociales: Facer una versión asturiana de la “Cup Song” que cuenta yá con millones de visites nes sos munchísimes versiones.

Dende que la película “Pitch Perfect” y l’actriz Anna Kendrick contribuyeron a esparder esti fenómenu que combina música, percusión y participación social, la “Cup song” o “El Cantar del Vasu” convirtiose nun fenómenu de mases ente la xente mozo como sinónimu de la collaboración.

Asina lo fixeron yá dende l’espaciu escolar n’otros sitios con llingües pequeñes como la nuestra, siendo los más nombraos el casu d’Irlanda y Navarra, onde mandaron un mensaxe de futuru y esperanza pal so idioma al restu del mundu.

Cola metáfora del vasu que pasa de mano en mano y la señardá por perder la esencia de lo que somos, queremos contribuyir faciendo saber al restu del mundiu qu’existe un sitiu que se llama Asturies que tien una llingua propia y en peligru. Y diciéndo-y a la sociedá asturiana que l’asturianu tien futuru.

Si quies ver un vidiu de cómo se fae’l cantar del vasu, Covadonda (alumna d’asturianu del IES de Noreña) desplícavoslo.