Lletra

El cantar orixinal “When I’m Gone” ye autoría d’A.P. Carter. Unos años más tarde, en 1931, The Carter Family grabólu como un cantar de bluegrass. Col pasu del tiempu tuvo innumerables versiones. Nel añu 2009 el grupu Landshapes (agora conocíu como Lulu and the Lampshades) volvieron grabalu, axuntándo-y unes partes nueves escrites por Luisa Gerstein, y usando’l xuegu del vasu (mui asemeyáu a los ritmos tradicionales de los panaderos) como ritmu pa la percusión. Esti vidiu espardióse de forma viral na Rede depués que’l sitiu web Reddit lu referenciare, xenerando un cientu de versiones distintes pero siempres col ritmu del xuegu de los vasos presente.

A primeros del añu 2013, esti cantar blinca fuera de la Rede gracies a la versión d’Anna Kendrick pa la película Pitch Perfect.

Esi mesmu añu, xunu del 2013, los 600 alumnos y alumnes d’un institutu irlandés faen la so propia versión, cantada pola alumna Laoise Nolan, pa promocionar y festexar la llingua Gaélica.

Si quies ver un vidiu de cómo se fae’l cantar del vasu, Covadonda (alumna d’asturianu del IES de Noreña) desplícavoslo.

Danme un billete pa colar d’equí
Con dos botelles pal camín
Y anque yo llevo yá mil años xunto a ti
Marcho mañana ¡Seique sí!

Si nun toi, si nun toi,
¿Escaecerásme si nun toi
O verásme en cualquier llau y llorarás desconsoláu?
¿Escaecerásme si nun toi?

Si nun toi, si nun toi,
vas alcordate bien de min.
vas alcordate del mio andar, la mio forma de pensar…
¡Ai! Vas alcordate bien de min

Tengo billete pa marchar d’equí,
El meyor sitiu pa vivir,
Guapos montes, guapos ríos,
Peñes que te dan respigos
Van paecete vacíos ensin min

Si nun toi, si nun toi,
vas alcordate bien de min.
vas alcordate del mio andar, la mio forma de pensar…
¡Ai! Vas alcordate bien de min

Si nun toi, si nun toi,
¿Escaecerásme si nun toi
o morrerás de señardá por nun ser tu nunca más?
¿Escaecerásme si nun toi?

Si nun toi, si nun toi,
vas alcordate bien de min.
vas alcordate del mio andar, la mio forma de falar…
¡Sí! Vas alcordate bien de min